المدونه وحشتني اوي مش عارف ايه فكرني بيها دلووقتي
ماعلينا .... عندي احساس ان رمضان السنه دي غير كل سنه
زمان الواحد وهو داخل علي رمضان كان بيلاقي روحانيات غير عاديه
كنت اصحي من النوم بدري قبل السحور اتسحر واصلي الفجر واقرأ قرءان واكمل يومي نشيط
لحد الفطار وكنا دايما نشغل بكار كان بيجي بالضبط علي أدان المغرب
كنت اروح اصلي وكان بيفوتني منه حته واخلي اخواتي يحكولي الحته الي عدتني لما ارجع
انما السنه دي غريبه بجد
نوم طول النهار واكل طول الليل
وانا صغير والدي دايما كان يخدني في ايدو عشان نصلي التراويح
وكان عندي جلبيه بيضه صغيره وطقيه كانت واسعه شويه بس كنت بحبها اوي ولسا محتفظ بيها لحد دلوقتي
وكنا نمشي نروح المسجد وانا في منتهي السعاده وهو ماسكني في ايدو
وكنا نخلص صلاه وبابا يجبلي ايس كريم
تقريبا هو دا كان سر اصراري اني اكمل الصلاه كلها
لما كبرت شويه فهمت ليه والدي كان بيعمل كدا
كان بيحاول علي اد مايقدر يخليني ادرب واصبر لاخر ركعه
وفعلا من ساعتها معدنيش ولا يوم تروايح لحد دلوقتي
غير اليوم الغريب بتاع امبارح ... كنت راجع من السفر تعبان ومطبق قبلها بيوم
كل الي فاكره اني نمت وصحيت علي السحور فطرت واتسحرت في نفس الوقت
مدايق من نفسي اوي ..نفسي ارجع تاني صغير
نفسي البس الجلبيه البيضه والطقيه الواسعه
نفسي والدي يرجع يخدني في ايدو كل يوم
وهو رايح يصلي
